新假期-「化骨茄汁秋刀魚」

「茄汁沙甸魚」可能是打風期間最受歡迎的罐頭食品之一，通常一罐已經可以送幾碗飯。不過罐頭始終有添加劑，其實自家製都可以做出罐頭的化骨效果，而且味道可更上一層樓！今次我用當造肥美的秋刀魚取代沙甸魚，加上蕃茄的茄紅素有抗衰老的作用，實在是一款簡單健康又養顏的菜式。「自家製」幾時都健康有益得多！

材料
秋刀魚：6條
乾蔥：5粒（切茸）
蒜頭：5粒（切茸）
指天椒：1-2隻
蔥：約3-4棵（一開二切段）

蕃茄汁及調味料
蕃茄茸：500g
香葉(月桂葉)：3片
魚露：3茶匙
砂糖：6茶匙
鹽：1茶匙
雞粉：2茶匙
Tabasco辣椒汁：2湯匙
喼汁：3湯匙
青檸汁：1個份量
黑胡椒碎：適量

做法
1：秋刀魚解凍後劏好，清理內臟及洗淨，吸乾水分，於中間一開為二，備用。

2：鍋中下適量油，先爆香乾蔥茸及蒜茸，下蔥段在鍋底，下指天椒，蕃茄汁及調味料，最後將秋刀魚放入，大火將汁煮滾後加蓋，以小火燜煮約兩小時左右，至魚骨酥化，熄火，不要開蓋，至煱內溫度自然降低後，放入雪櫃保存讓它入味，隔天翻熱後食用。

貼士
1：此做法亦可以沙甸魚代替，各俱風味。指天椒的份量可因應個人愛辣的程度而增多或減少。

2：如吃時覺得味道不夠，可加些美極鮮醬油伴吃，更添風味。